1. No Boundary Cafe
小編上網嘗試搵過適合溫書嘅 Cafe，但係呢啲地方一係就太過貴，一係就位於啲遠離市區嘅地方，一啲都唔就腳。最近，小編同朋友想搵個地方靜靜哋做吓嘢，想食西餐但係又唔想太貴，咁啱經過呢間位於銅鑼灣希雲街嘅小店，見到 all-day breakfast 都係 $68 起，所以就入咗去試吓。
呢間 cafe 叫做 No Boundary，店舖範圍唔大，但係勝在夠舒服，人流唔算多，相信坐耐少少都唔會俾人趕走，同學可以留耐少少喺度讀書。
Cafe嘅裝修簡潔，如果坐梳化位嘅話就更加舒服，坐耐啲喺度溫書、做嘢都幾舒服。
小編讀中學嗰陣都冇乜零用錢，所以都會想搵返啲學生價嘅餐廳食嘢。而家中學畢咗業，小編賣 DSE 英文筆記 (中文、英文、通識科) 嗰陣都會向有經濟困難嘅同學提供半價優惠，希望可以減輕同學嘅負擔，而小編呢度介紹嘅 No Boundary Cafe 雖然位於銅鑼灣，但係佢都係一間比較平民價嘅 Cafe，準備考 DSE 嘅高中同學都會負擔得起。
一般西餐廳嘅 all-day breakfast 都會買超過$100 ，而呢度嘅 all-day breakfast 只係賣$68 ，而小編最近經過呢間 cafe 見到佢最近推出左早餐、下午茶都只係$48起，小編親身試過，真係價廉物美。如果同學嚟到港島區，想搵個地方坐下、食下野，順便溫書嘅話，No Boundary Cafe會係一個唔錯嘅選擇。
更重要嘅係… No Boundary Cafe 距離中央圖書館只係5分鐘嘅路程，同學想去中央圖書館借 DSE Past Paper 嘅話，只需要行5分鐘就會去到，真係超方便！
更新：No Boundary Cafe成為咗黃店地圖嘅其中一間熱門cafe, 所以而家變咗一間唔太坐得耐嘅cafe，同學可以支持吓黃店，不過作為溫書地方的話，可以參考其他cafe。
Cafe 地址：銅鑼灣希雲街9號地下
2. Whitewood Coffee
如果同學係住沙田嗰邊嘅話，小編會推介 Whitewood Coffee 呢一間 Cafe，呢度會提供一個舒適嘅環境，比同學專心去溫書，準備考 DSE。
Whitewood Coffee 位置係一個商場入面唔起眼嘅角落，店舖嘅範圍同樣唔大，小編目測呢間 Cafe 大概可以坐到20個人左右。雖然呢間 Cafe 嘅座位唔多，好快就滿座，但係 Cafe 入面嘅職員都好好人，唔會將客人趕走，係一間坐得耐嘅cafe。
小編同朋友就試過喺呢一間 Cafe 溫書，點咗兩杯飲品就坐左大半日（小編份 English Vocab Notes 就係喺呢度出世架啦!) 小編個人幾鍾意呢度嘅環境，但係朋友就覺得周圍有人講緊嘢有少少嘈，但係朋友戴咗耳機聽住音樂溫書其實都可以專心讀書。如果同學習慣溫書聽歌嘅話，相信同學都可以喺度專心溫書，備戰 DSE。
因為小編唔鍾意飲咖啡，所以點左一杯熱朱古力。上面嘅拉花超級可愛，朱古力味道都唔錯，不過小編個人認為甜咗少少。
小編上網見到食評話呢間 Cafe 最出名嘅係佢哋嘅厚鬆餅，但係因為小編胃口比較細，去到Cafe 只係想搵個位飲杯嘢，做吓嘢（就好似未考 DSE 嘅同學要溫書咁）所以就冇點到佢哋嘅鬆餅。不過，小編見到網上嘅圖片都幾吸引，同學有機會可以試吓呢個溫書好去處。
Cafe 地址：沙田石門安群街3號京瑞廣場一期2樓207號舖
小編推介坐得耐嘅cafe當然唔止咁少！同學想睇溫書cafe推薦的話，可以睇埋全文： https://hkdsegayau.com/dse-study-cafe-recommendation/
留言列表
